जगबुडी नदीत ‘मासळीचा महापूर’
दाभोळखाडीतील मच्छिमारांच्या जाळ्यात दोन टनांची बम्पर मासळी
मच्छिमार अक्षरशः थक्क, गूढ कायम
खेड : दाभोळखाडी परिसरातील खेड तालुक्यातून वाहणाऱ्या जगबुडी नदीत मच्छिमारांच्या जाळ्यात तब्बल दोन टनांहून अधिक मासळी अडकून पडल्याची थरारक घटना समोर आली असून, या अचानक मिळालेल्या बम्पर मासळीमुळे मच्छिमार अक्षरशः थक्क झाले आहेत. आयनी भोईवाडी परिसरात दोन दिवसांपूर्वी ही घटना घडली.
मिळालेल्या माहितीनुसार, नेहमीप्रमाणे मच्छिमारांनी पहाटे जगबुडी नदीत जाळे टाकले. मात्र जाळे उपसताना एका क्षणातच मोठ्या प्रमाणात मासळी त्यात अडकल्याचे दिसून आले. जाळे ओढण्यासाठी अतिरिक्त मेहनत घ्यावी लागली. काही वेळातच हे स्पष्ट झाले की जाळ्यात मांगण, पालू, कालचडू यांसारख्या विविध जातींची प्रचंड प्रमाणात मासळी अडकली आहे. अंदाजे दोन टनांहून अधिक मासळी मिळाल्याने संपूर्ण परिसरात आश्चर्य आणि कुतूहलाचे वातावरण निर्माण झाले.
या बम्पर मासळीचा साठा नंतर होलसेल पद्धतीने बाहेरील व्यापाऱ्यांना विकण्यात आला, ज्यामुळे मच्छिमारांना मोठा आर्थिक लाभ झाला. अनेक दिवसांच्या कष्टाचे चीज एका दिवसात झाल्याची भावना मच्छिमारांनी व्यक्त केली.
विशेष म्हणजे, गतवर्षीदेखील याच परिसरात अशाच प्रकारे मोठ्या प्रमाणात मासळी सापडल्याची घटना घडली होती. त्यामुळे वर्षातून एखाद्या वेळेस जगबुडी नदीत अचानकपणे इतक्या मोठ्या प्रमाणात मासळी सापडण्यामागे नेमके कारण काय, याबाबत चर्चा रंगू लागली आहे. नदीचा बदललेला प्रवाह, पाण्याची पातळी, समुद्राच्या भरती-ओहोटीचा परिणाम, हवामानातील बदल की अन्य काही नैसर्गिक घटक यासाठी कारणीभूत आहेत का, असा प्रश्न उपस्थित केला जात आहे.
दाभोळखाडीचा ऐतिहासिक संदर्भ, निसर्गरम्य रचना आणि या परिसराशी जोडलेल्या विविध लोककथांमुळे या घटनेला आणखी गूढतेची किनार लाभली आहे. काहीजण याला निसर्गाचा चमत्कार मानत असून, तर काहीजण वैज्ञानिक कारणांचा शोध घेण्याची गरज व्यक्त करत आहेत.
मच्छिमारांसाठी ही घटना जरी आर्थिकदृष्ट्या दिलासादायक व आनंददायी ठरली असली, तरी जगबुडी नदीत दरवर्षी घडणाऱ्या अशा बम्पर मासळीमागचे गूढ अजूनही कायम असून, या घटनेची चर्चा तालुक्यासह संपूर्ण कोकणात सुरू आहे.
