उद्योगातील दिग्गजांनी केले घरडा संस्थेच्या रासायनिक अभियांत्रिकी विभागाचे कौतुक
लोटे : घरडा इन्स्टिट्यूट ऑफ टेक्नॉलॉजीच्या केमिकल इंजिनिअरिंग विभागाने ३० व ३१ जानेवारी रोजी दीपक फर्टिलायझर्स लिमिटेड, मुंबई येथील उद्योगतज्ज्ञांशी विशेष संवाद कार्यक्रमाचे आयोजन केले होते. या उपक्रमाला विद्यार्थ्यांचा उत्स्फूर्त प्रतिसाद लाभला.
संशोधन व नवीन उत्पादन विकासाचा व्यापक अनुभव असलेले उद्योगतज्ज्ञ डॉ. राजेश घाडगे यांनी विद्यार्थ्यांशी संवाद साधत प्रकल्पाच्या विविध टप्प्यांबाबत तसेच भांडवली गुंतवणुकीच्या पद्धतींबाबत सविस्तर मार्गदर्शन केले. विद्यार्थ्यांनी नियमित वाचन करून या क्षेत्रातील नवीनतम ज्ञान आत्मसात करण्याची गरज त्यांनी अधोरेखित केली.
यानंतर अंतिम वर्षाच्या विद्यार्थ्यांनी सादर केलेल्या प्रकल्प कार्याने डॉ. घाडगे प्रभावित झाले. दुसऱ्या दिवशी त्यांनी विद्यार्थ्यांना मुलाखतींना सामोरे जाताना आवश्यक असलेल्या कौशल्यांबाबत महत्त्वपूर्ण मार्गदर्शन केले.
यावेळी डॉ. घाडगे यांनी विभागातील शिक्षक व कर्मचाऱ्यांशी संशोधन तसेच नाविन्यपूर्ण अध्यापन पद्धतींवर संवाद साधला. या कार्यक्रमासाठी डॉ. सुहास डोके व इतर कर्मचाऱ्यांनी घेतलेल्या प्रयत्नांचे विभागप्रमुख डॉ. सुनील कुलकर्णी यांनी विशेष कौतुक केले.
तसेच विभागातील शिक्षकांना आउटरीच उपक्रम व संशोधन प्रकाशनांचे महत्त्व सांगून त्यासाठी सातत्याने प्रयत्न करण्याचा सल्ला देण्यात आला. विभागाने या क्षेत्रात केलेल्या प्रगतीमुळे उद्योगतज्ज्ञ अत्यंत समाधानी असल्याचे त्यांनी नमूद केले.
घरडा इन्स्टिट्यूट ऑफ टेक्नॉलॉजीचा केमिकल इंजिनिअरिंग विभाग जवळच्या उद्योगांसाठी कुशल अभियंते घडविण्यात प्रसिद्ध असून विद्यार्थ्यांसाठी रोजगाराच्या संधी उपलब्ध करून देण्याचे कार्य देखील विभागामार्फत केले जाते. उद्योग व शैक्षणिक संस्थांमधील संवाद वाढविण्याची परंपरा विभागाने कायम राखली आहे.
या उपक्रमाबद्दल संस्थेचे प्राचार्य डॉ. पी. बी. पाटील, उपप्राचार्य डॉ. एस. के. पाटील आणि रजिस्ट्रार प्रा. मुनघाटे यांनी विभागाचे अभिनंदन केले.
