बोरघर येथे ‘पंडित दीनदयाळ उपाध्याय प्रशिक्षण महाभियान’ उत्साहात
खेड : भारतीय जनता पार्टीच्या वतीने देशभर राबविण्यात येत असलेल्या ‘पंडित दीनदयाळ उपाध्याय प्रशिक्षण महाभियान’चा शुभारंभ खेड तालुक्यातील बोरघर (जोशी फार्म) येथे उत्साहपूर्ण वातावरणात पार पडला. भाजपा उत्तर खेड मंडलाच्या वतीने आयोजित या प्रशिक्षण कार्यक्रमाला पदाधिकारी व कार्यकर्त्यांचा उत्स्फूर्त प्रतिसाद लाभला.
या प्रसंगी भाजपा नेते तथा खेड नगर परिषदेचे माजी नगराध्यक्ष ॲड. वैभव खेडेकर, भाजपा रत्नागिरी जिल्हाध्यक्ष सतीश मोरे, दापोली विधानसभा प्रमुख तसेच नवनिर्वाचित जालगाव पंचायत समिती सदस्य श्रीराम इदाते यांनी उपस्थितांशी संवाद साधत सविस्तर मार्गदर्शन केले. त्यांनी प्रशिक्षण महाभियानास शुभेच्छा देत कार्यकर्त्यांना संघटनात्मक बळकटीसाठी प्रेरित केले.
यावेळी मान्यवरांनी आपल्या भाषणात सांगितले की, महान तत्त्वज्ञ व एकात्म मानवतावादाचे प्रवर्तक पंडित दीनदयाळ उपाध्याय यांच्या विचारांवर आधारित हे महाभियान अत्यंत महत्त्वपूर्ण आहे. राष्ट्रसेवा ही केवळ राजकारणापुरती मर्यादित नसून समाजकारण आणि संस्कारांची जोड असलेली व्यापक प्रक्रिया आहे, हे दीनदयाळजींनी आपल्या कार्यातून दाखवून दिले. त्यांच्या आदर्शांमधून प्रेरणा घेत कार्यकर्त्यांना सक्षम बनविणे, हे या अभियानाचे मुख्य उद्दिष्ट आहे.
आजच्या वेगाने बदलणाऱ्या सामाजिक व राजकीय परिस्थितीत कार्यकर्त्यांनी अभ्यासू, सक्षम आणि समाजाशी निगडित असणे गरजेचे आहे. हे प्रशिक्षण महाभियान कार्यकर्त्यांच्या विचार, आचरण आणि संघटन कौशल्यांना धार देणारे प्रभावी व्यासपीठ ठरणार असल्याचा विश्वास मान्यवरांनी व्यक्त केला. या माध्यमातून नेतृत्वगुण विकसित होऊन समाजातील विविध घटकांशी संवाद अधिक प्रभावी होईल आणि राष्ट्रनिर्मितीच्या प्रक्रियेत कार्यकर्त्यांचे योगदान अधिक बळकट होईल, असेही त्यांनी नमूद केले.
कार्यक्रमास रत्नागिरी जिल्हा उपाध्यक्ष संजय आखाडे, उत्तर रत्नागिरी जिल्हा सरचिटणीस वसंत ताम्हणकर, खेड तालुका अध्यक्ष ऋषिकेश मोरे, खेड शहर अध्यक्ष भालचंद्र (नंदू) साळवी, अल्पसंख्यांक जिल्हाध्यक्ष तथा नगरसेवक गटनेते रहीम सहिबोले, नगरसेविका वैभवी खेडेकर, स्वप्नाली चव्हाण, सचिन होडबे, युवा मोर्चा जिल्हा सरचिटणीस अॅड. मिलिंद (दादू) नांदगांवकर, माजी नगराध्यक्षा उर्मिला पाटणे-शेट्ये, दापोली महिला तालुका अध्यक्षा जयाताई साळवी, प्रसाद मांडवकर, माजी नगरसेवक संदेश भुवड, भाजपा रिक्षा सेल जिल्हाध्यक्ष सिकंदर बांगी, राहुल पाटणे, सोशल मीडिया प्रमुख सर्वेश पवार, ओवैस चौगुले, अक्षय संगारे, प्रदीप भोसले यांच्यासह अनेक पदाधिकारी व कार्यकर्ते मोठ्या संख्येने उपस्थित होते.
एकूणच, या प्रशिक्षण महाभियानाच्या माध्यमातून भाजपा कार्यकर्त्यांना नवचैतन्य प्राप्त होऊन संघटन अधिक मजबूत होण्यास हातभार लागणार असल्याचे चित्र या कार्यक्रमातून दिसून आले.
