‘हावडा-गुवाहाटी’ पहिली वंदे भारत स्लीपर ट्रेन सेवा सुरु
मालदा (पश्चिम बंगाल): भारतीय रेल्वेच्या इतिहासात आजचा दिवस सुवर्ण अक्षरांनी लिहिला गेला आहे. पंतप्रधान नरेंद्र मोदी यांनी शनिवारी पश्चिम बंगालमधील मालदा रेल्वे स्थानकावरून देशातील पहिल्या वंदे भारत स्लीपर ट्रेनला (Vande Bharat Sleeper Train) हिरवा झेंडा दाखवून रवाना केले. ही अत्याधुनिक ट्रेन हावडा ते गुवाहाटी (कामाख्या) द्रम्यान धावणार असून, यामुळे ईशान्य भारताचा प्रवास अधिक वेगवान आणि सुखकर होणार आहे.
लहान मुलांसोबत रंगल्या गप्पा
या ऐतिहासिक सोहळ्यादरम्यान पंतप्रधान मोदींनी रेल्वे स्थानकावर आणि ट्रेनमध्ये उपस्थित असलेल्या लहान मुलांशी अतिशय जिव्हाळ्याने संवाद साधला. मुलांच्या चेह-यावरील आनंद पाहून पंतप्रधानांनी त्यांच्याशी गप्पा मारल्या आणि त्यांच्या भविष्यातील स्वप्नांबाबत विचारपूस केली. या संवादाचे फोटो आणि व्हिडिओ सध्या सोशल मीडियावर मोठ्या प्रमाणात व्हायरल होत आहेत.
वंदे भारत स्लीपर ट्रेनची खास वैशिष्ट्येः
🟢हावडा-गुवाहाटी वंदे भारत स्लीपर ट्रेन ही केवळ वेगवान नसून ती अनेक जागतिक दर्जाच्या सोयीसुविधांनी सज्ज आहेः
🟢वेग आणि वेळः ही ट्रेन हावडा ते गुवाहाटी दरम्यानचे अंतर अवध्या १४ तासांत कापणार आहे. यामुळे प्रवाशांचा सुमारे ३ तासांचा वेळ वाचणार आहे.
🟢आरामदायी प्रवासः लांब पल्ल्याच्या प्रवासासाठी खास डिझाइन केलेल्या या ट्रेनमध्ये प्रवाशांना विमानासारखा अनुभव मिळणार आहे. गादीचे उत्कृष्ट कुशनिंग आणि आधुनिक इंटीरियर हे याचे मुख्य आकर्षण आहे.
🟢कोचची रचनाः या ट्रेनमध्ये एकूण १६ कोच असून त्यात १ फर्स्ट एसी, ४ सेकंड एसी आणि ११ थर्ड एसी कोचचा समावेश आहे.
🟢सुरक्षाः स्वदेशी बनावटीची ‘कवच’
(KAVACH) प्रणाली, सीसीटीव्ही कॅमेरे आणि अग्निशमन यंत्रणेने ही ट्रेन सज्ज आहे.
🟢अत्याधुनिक सोयीः स्वयंचलित द्रवाजे, मोबाइल चार्जिंग पॉइंट्स, रिडिंग लाईट्स आणि मॉड्युलर टॉयलेट्सची सोय करण्यात आली आहे.
🟢हावडा-गुवाहाटी प्रवासाचे वेळापत्रक आणि दरः
ट्रेन क्रमांकः २७५७५/२७५७६
मार्गः ही ट्रेन मालदा टाउन, न्यू जलपाईगुडी, न्यू कूचबिहार आणि न्यू बोंगाईगाव अशा महत्त्वाच्या स्थानकांवर थांबेल.
तिकीट दरः ३-टायर एसीसाठी सुमारे २,२९९ रुपयांपासून भाडे सुरू होते.
