राज ठाकरे यांच्या वाढदिवसानिमित्त मनसे वाहतूक सेनेकडून सामाजिक उपक्रमांची मालिका
🔷 होमहवन, मोफत सीएनजी वाटप, वृक्षारोपण आणि विद्यार्थ्यांना वह्यांचे वितरण
🔷 जिल्हाध्यक्ष राजू खेतले यांच्या पुढाकारातून वाढदिवस अनोख्या पद्धतीने साजरा
चिपळूण : महाराष्ट्र नवनिर्माण सेनेचे अध्यक्ष राज ठाकरे यांच्या वाढदिवसानिमित्त मनसे वाहतूक सेनेच्या वतीने विविध सामाजिक, पर्यावरणपूरक आणि जनहिताचे उपक्रम राबवून वाढदिवस अनोख्या पद्धतीने साजरा करण्यात आला. बॅनरबाजी आणि होर्डिंग्जना फाटा देत मनसे वाहतूक सेनेचे रत्नागिरी जिल्हाध्यक्ष राजू खेतले यांच्या नेतृत्वाखाली दिवसभर विविध कार्यक्रमांचे आयोजन करण्यात आले.
वाढदिवसानिमित्त सकाळी चिपळूणजवळील कान्हे मंदिरात अभिषेक व होमहवन करण्यात आले. यावेळी मनसे अध्यक्ष राज ठाकरे यांच्या निरोगी, सुखी आणि दीर्घायुष्यासाठी विशेष प्रार्थना करण्यात आली. धार्मिक कार्यक्रमानंतर सामाजिक बांधिलकी जपत रिक्षाचालकांसाठी मोफत सीएनजी गॅस वाटपाचा उपक्रम राबविण्यात आला. वाढत्या इंधन दरांच्या पार्श्वभूमीवर या उपक्रमाला रिक्षा व्यावसायिकांनी उत्स्फूर्त प्रतिसाद दिला.
याचबरोबर परिसरातील विविध शाळांमध्ये विद्यार्थ्यांना शैक्षणिक साहित्य म्हणून वह्यांचे वाटप करण्यात आले. शिक्षणाला प्रोत्साहन देण्याच्या उद्देशाने राबविण्यात आलेल्या या उपक्रमाचे पालक आणि शिक्षकांनी स्वागत केले.
पर्यावरण संवर्धनाचा संदेश देण्यासाठी मुंबई-गोवा राष्ट्रीय महामार्गासह चिपळूण तालुक्यातील विविध गावांमध्ये मोठ्या प्रमाणावर वृक्षारोपण करण्यात आले. विशेष म्हणजे, लावण्यात आलेल्या रोपांची पुढील काळात योग्य देखभाल व्हावी यासाठी गावागावातील मनसे पदाधिकाऱ्यांवर जबाबदारी सोपविण्यात आली. त्यामुळे हा उपक्रम केवळ वृक्षारोपणापुरता मर्यादित न राहता वृक्षसंवर्धनाकडेही लक्ष देणारा ठरला.
या सर्व कार्यक्रमांमधून मनसेच्या कार्यकर्त्यांनी राज ठाकरे यांच्या विचारांचा वारसा जपत सामाजिक उत्तरदायित्वाचे दर्शन घडविले. जिल्हाध्यक्ष राजू खेतले यांच्या नियोजनामुळे वाढदिवसाचा कार्यक्रम जनसामान्यांपर्यंत पोहोचला आणि त्याला उत्स्फूर्त प्रतिसाद मिळाला.
यावेळी मनसे वाहतूक सेनेचे खेड तालुकाध्यक्ष शशिकांत (पप्पू) आंब्रे, चिपळूण तालुकाध्यक्ष मिलिंद कदम, माजी महिला तालुकाध्यक्ष संजीवनीताई शिंदे, सुनील मोडक, भाई सुर्वे, राजेंद्र उंडरे, राजेंद्र गोंजारी, विनोद चिपळूणकर, जया जाधव, संजय वाजे, बाबू देसाई, मनोज सोळंके, साहिल मणियार, असिफ मुल्ला, अफजल खान, इटकर चौगुले, साहिल खेतले यांच्यासह मनसेचे पदाधिकारी, कार्यकर्ते आणि नागरिक मोठ्या संख्येने उपस्थित होते.
राज ठाकरे यांचा वाढदिवस केवळ औपचारिक कार्यक्रमांपुरता मर्यादित न ठेवता सामाजिक, शैक्षणिक आणि पर्यावरणपूरक उपक्रमांच्या माध्यमातून साजरा केल्याने या उपक्रमाची जिल्हाभर चर्चा होत असून मनसे वाहतूक सेनेच्या कार्यकर्त्यांचे सर्व स्तरांतून कौतुक होत आहे.
